Amitraha - Bisti apropia

Mas tips.

Prepara pa un bon prome impresion:

Semper corda cu un vestuario profesional y apropia ta un otro recurso pa haci un impresion positivo.
E mesun vestuario por wordo ripiti pa tur entrevista te na e momento cu bo encontra bo pasion.

STAP 3 - Bisti apropia pa bo entrevista di trabou

Na cada momento di contacto cu un dunado di trabou, bo vestuario por yuda manda e mensahe cu bo ta un persona serio, responsabel y dispuesto pa eherce e funcion. P’esey ta importante pa ta consciente di loke bo scoge pa bisti for di e momento di busca un formulario di aplicacion, entrega di bo CV personalmente te cu dia di bo entrevista.

Ta importante pa bo:

Scoge paña apropia y profesional

Bisti apropia pa un entrevista ta demostra madurez pa e puesto di trabou. Esaki tambe ta indica cu bo ta un persona responsabel pa representa e compania.
Uza paña cu colornan neutral

Generalmente e deseo ta pa un ‘hiring manager’ keda corda bo cualificacion y personalidad, no locual bo tabata tin bisti. P’esey scoge paña cu colornan neutral manera blanco, beige, shinishi, khaki of blauw scur (‘navy’) pa un ‘look’ profesional.
Un bachi no ta necesario pa mustra profesional

Un camisa of polo shirt sin logo y sin texto ta aceptabel pa bo entrevista den sector Horeca. Esakinan mester ta limpi y strica.
Scoge carson of saya conservativo

Jeans y short no ta un bon escogencia pa entrevista. Ta miho pa scoge un carson apropia den largura of saya no mas halto cu bo rudia y cu ta fit bo curpa apropiadamente.
Un bon sapato ta yuda cu bon postura y ta demostra profesionalismo

Sapato manera keds, sandalia of slof ta demasiado casual pa un entrevista. Pa completa bo vestuario scoge sapato sera y limpi den color bruin of preto. Ta preferibel pa scoge sapato cu hilchi comodo cu ta menos di 8 centimeter di haltura.
Ta consehabel pa no uza perfume

Tur hende ta reacciona diferente na e holo di perfume y algun hende por ta alergico. E meta ta pa presenta cu un aparencia limpi y representabel pa asina ‘hiring managers’ por concentra riba bo ideanan y cualificacion pa e posicion.
No ignora cabey, barba y higiena personal

Un barba well-groomed ta apropia. Mantencion di bo cabey y higiena personal ta yuda refina bo aparencia profesional, mandando e mensahe cu bo lo ta un bon representante di e compania y Aruba en general.

Sigui cu: Representa bo mes

Ehempel di kico pa SI bisti

Ehempel di kico pa NO bisti